NFTE KARAIKUDI

 நூற்றாண்டு காணும் 

முதல் இடஒதுக்கீடு அரசாணை

 

தமிழ்நாட்டில் இட ஒதுக்கீட்டிற்கு வழிவகுக்கும்

COMMUNAL G.O., எனப்படும் வகுப்புவாரி

பிரதிநிதித்துவத்திற்கான அரசாணை வெளியிடப்பட்டு

இன்றோடு 100 ஆண்டுகள் ஆகின்றன.

கடந்த நூற்றாண்டின் துவக்கத்தில்

மெட்ராஸ் மாகாணத்தில் கல்விக்கூடங்களும்

அரசு வேலை வாய்ப்புகளும்

மெல்ல மெல்ல அதிகரிக்க ஆரம்பித்த காலகட்டத்தில்,

கல்வி பயிலும் வாய்ப்புகளையும்...

அரசில் பணியாற்றும் வாய்ப்புகளையும்

ஒரு சாரரே பெறுகிறார்கள் என கவனம் ஏற்பட ஆரம்பித்தது. 

அதன் உச்சகட்டமாகவே  COMMUNAL G.O எனப்படும் 

இடஒதுக்கீட்டிற்கான அரசாணை பிறப்பிக்கப்பட்டது.

 

1916ல் உருவாக்கப்பட்ட

தென்னிந்திய நல உரிமைச் சங்கம்

(South Indian Liberal Federation)

கல்வியிலும் வேலை வாய்ப்புகளிலும்

பிராமணரல்லாதோரின் பிரதிநிதித்துவம்

குறித்து தொடர்ந்து பேசிவந்தது.

1916 நவம்பரில் வெளியிடப்பட்ட  

கொள்கை அறிக்கை எல்லா சமூகத்தினருக்கும்

சம வாய்ப்புகள் கிடைக்க வேண்டுமென குறிப்பிட்டது. 

1921 ஆகஸ்ட் ஐந்தாம் தேதி சட்டப்பேரவையில் பேசிய

ஓ. தணிகாசலம் செட்டியார்

ஒரு தீர்மானத்தைக் கொண்டுவந்தார்.

ஒரு அரசு அலுவலகத்தில்

100 ரூபாய் அளவுக்கு சம்பளம் வாங்கும்

எல்லா அதிகாரிகள் மட்டத்திலும் 66 சதவீதம் அளவிற்கும்...

100 ரூபாய்க்கு கீழே ஊதியம் பெறுபவர்களில்

77 சதவீதம் அளவிற்கும்...

இட ஒதுக்கீட்டு இருக்கும் நிலை ஏற்பட வேண்டும்.

7 ஆண்டுகளில் இதை எட்ட வேண்டும்

என அந்தத் தீர்மானம் கூறியது.

இந்தத் தீர்மானத்தை நடேச முதலியார் வழிமொழிந்தார்.

 

"இந்தத் தீர்மானத்தை நிறைவேற்றுவதன் மூலம்

நாட்டிற்கே விடுதலை அளித்த மனிதர்களாக

எதிர்கால சந்ததி நம்மைக் கருதும்" என்றார்.

இந்தத் தீர்மானம் நிறைவேற்றப்பட்டது.

 

இதன் தொடர்ச்சியாகவே,

Communal GO என்று ஆங்கிலத்தில் அழைக்கப்பட்ட

வகுப்புவாரி பிரதிநிதித்துவத்திற்கான அரசாணை

பனகல் அரசர் தலைமையிலான அரசால்

செப்டம்பர் 16, 1921ல் வெளியிடப்பட்டது.

 

அரசு அலுவலகங்களில்

வேலை வாய்ப்புகளை அளிக்கும்போது,

12 இடங்களாக அவற்றைத் தொகுத்து

வேலை வாய்ப்புகளை அளிக்க வேண்டும்.

 

அதன்படி, 12 இடங்களில்...

2 இடங்கள் பிராமணர்களுக்கும்

ஐந்து இடங்கள் பிராமணரல்லாதவர்களுக்கும்

இரண்டு இடங்கள் இஸ்லாமியர்களுக்கும்

இரண்டு இடங்கள் கிறிஸ்தவர், ஐரோப்பியர்கள்,

ஆங்கிலோ - இந்தியர்களுக்கும் அளிக்க வேண்டும்.

ஒரு இடம் ஒடுக்கப்பட்ட பிரிவைச் சேர்ந்தவருக்குத் தரவேண்டும்.

 

இந்த ஆணை ஒழுங்காக செயல்படுத்தப்படுவதைக்

கண்காணிக்க சட்டமன்ற உறுப்பினர்களைக் கொண்ட

ஒரு குழுவும் அமைக்கப்பட்டது.

 

இதற்குப் பிறகு, 1922 ஆகஸ்ட் 15ஆம் தேதி

கல்வி நிலையங்களிலும் வகுப்புவாரி

பிரதிநிதித்துவத்தை அளிக்கும் அரசாணை வெளியிடப்பட்டது.

 

ஆனால், 1928 டிசம்பர் 15ஆம் தேதி

வெளியிடப்பட்ட மூன்றாவது  Communal GO மூலம்தான்,

இந்த இட ஒதுக்கீடுகள் அமலுக்கு வந்தன.

 

உண்மையில், இந்த அரசாணைகள் பிராமணரல்லாதவர்களுக்கான

இடஒதுக்கீட்டை வழங்கும் அரசாணைகளாக கருதப்பட்டாலும்,

இவை பிராமணர்களுக்கும் 16 சதவீத இடஒதுக்கீட்டை வழங்கின.

 

முன்னாள் முதல்வர் அண்ணா

இந்த அரசாணை குறித்துக் குறிப்பிடும்போது,

"தென்னாட்டைப் பொறுத்தவரைCommunal GO

திராவிட சமுதாயத்தின்...ஏன்- பார்ப்பனர் உள்பட

மனித சமுதாயத்தின் சுதந்திர சாசனம் ஆகும்.

என்று குறிப்பிட்டார்.

 

இந்தியா சுதந்திரம் பெற்று,

இந்திய அரசியலமைப்புச் சட்டம்

அமலுக்கு வந்த பிறகு,

இந்த அரசாணையை எதிர்த்து

இரு மாணவர்கள் உச்ச நீதிமன்றம் சென்றபோது,

இந்த  Communal GO செல்லாது என தீர்ப்பளிக்கப்பட்டது.

அதன் பிறகு இட ஒதுக்கீடு அளிக்க ஏதுவாக

இந்திய அரசியலமைப்புச் சட்டம் திருத்தப்பட்டது.

 

நன்றி – BBC இணையதளம்